Şu gün — 12-nji martda Türkmenistanyň Eýran Yslam Respublikasyndaky Ilçihanasynyň we Ykdysady hyzmatdaşlyk guramasynyň Medeniýet institutynyň goldawy bilen, bu guramanyň binasynda beýik türkmen şahyry we akyldary Magtymguly Pyragynyň doglan gününiň 300 ýyllygy mynasybetli dabaraly çäre geçirildi.

 

Bu çärä Eýran Yslam Respublikasynyň Daşary işler hem-de Medeniýet we Yslam gollanmasy ministrliginiň wekilleri, şeýle hem EYR-daky Türkmen Medeniýet öýüniň müdiri Ali Rähbär, Eýranyň Medeni eserler we ýadygärlikler birleşiginiň wise-prezidenti doktor Alireza Habibi, Horezmi uniwersitetiniň edebiýat professory, Magtymguly Pyragynyň döredijiligini öwrenýän doktor Nasser Koli Sarli, EYR-yň Mejlisiniň wekili doktor Amangylyç Şadmehr dagylar gatnaşdylar.

 

Çäräniň açylyş dabarasynda YHG-niň Medeniýet institutynyň Prezidenti jenap Saad Khan hem-de Ilçihananyň birinji sekretar-konsuly A.Baýramow dabaraly çykyş edip, olar öz çykyşlarynda 2024-nji ýyl Türkmenistanda «Pähim-paýhas ummany Magtymguly Pyragy» ýyly diýip yglan edilendigi we şunuň bilen baglylykda ýurdumyzda hem-de daşary ýurtlarda beýik türkmen şahyrynyň hem-de akyldarynyň 300 ýyllygyna bagyşlanan dürli medeni çäreleriň geçirilýändigini nygtap geçdiler.

 

Şeýle-de medeni çäräniň dowamynda magtymgulyşynaslar tarapyndan türkmeniň beýik şahyry Magtymguly Pyragynyň goşgulary mazmunly okalyp, akyldaryň gelip çykyşy hem-de döredijiligi barada bellenilip geçildi.

 

Çäräniň dowamynda taraplar Ilçihana bilen YHG-niň Medeniýet Institutynyň arasynda alnyp barylýan medeni we ynsanperwer ugurlardaky ikitaraplaýyn gatnaşyklar barada hem maslahatlaşdylar. Halkara guramalarynyň ösüşiniň ýokary dinamikasy, şeýle hem netijeli hyzmatdaşlygyň giň mümkinçilikleriniň, çeşmeleriniň we geljeginiň bardygyna ünsi çekildi.