Türkmen döwlet gurjak teatrynyň resmi web saýtynyň synag tertibinde işe başlandygyny «Türkmenistan: Altyn asyr» saýty habar berýär.

Täze internet sahypa ulanyjylara ýakyn wagtda boljak teatr premýeralary we onlaýn petek satyn almak mümkinçiligi barada iň täze maglumatlary hödürlär.

Mundan başga-da, saýtda teatr aktýorlary hakda maglumatlar bar. Çykyşlaryň reňkli suratlary we afişalary bilen galereýa döredildi. Tomaşaçylara amatly bolar ýaly afişalara gysga düşündiriş berilýär.

Saýt dört dilde — türkmen, türk, iňlis we rus dillerinde ulanyjylara hyzmat edýär.

Türkmen döwlet gurjak teatry çagalaryň dynç alýan ýerleriniň biridir. Bu ýerde oglanjyklar we gyzjagazlar diňe bir halaýan gahrymanlarynyň çykyşlara tomaşa etmek bilen çäklenmän, aktýorlar bilen söhbet edip, gurjak sahnalarynyň agzalary bilen oýnap bilerler.

Häzirki wagtda «Aladdin», «Arşin Mal Alan», «Alýaňak» ertekileri çagalaryň arasynda gaty meşhur. Ýakyn wagtda «Mähekdaş» pýesasynyň premýerasyna garaşylýar. Häzirki günlerde teatr topary Magtymguly Pyragynyň doglan gününiň 300 ýyllygyna bagyşlanan kitaplaryň ähmiýeti barada spektakl taýýarlamagyň üstünde işleýär.