UEFA Çempionlar Ligasynda ilkinji finalçy belli boldy. Parižde oýnalan ýarym finalyň jogap duşuşygynda-da «Borussiýa Dortmund» PSŽ-ni 1-0 hasabynda ýeňlişe sezewar etdi.

Nemes klubuny finala çykaran ýeke-täk goly 50-nji minutda Mats Hummels derwezeden geçirdi. Ol UÇL-de gol geçiren iň ýaşuly nemes futbolçysy, şol sanda ýarym finalda tapawutlanan iň ýaşuly 3-nji futbolçy hökmünde hasaba alyndy. Şunlukda, 2 oýnuň netijesi boýunça 2-0 hasabynda ýeňşini baýram eden «Borussiýa Dortmund» topary Londondaky «Uembli» stadionynda geçiriljek finalda oýnamaga hukuk gazandy. «Borussiýa Dortmund» mundan öň 2 gezek finala çykyp, 1997-nji ýylda çempion bolupdy, 2013-nji ýylda bolsa «Bawariýada» asgyn gelipdi. 2013-nji ýyldaky final «Uemblide» geçirilipdi. «Borussiýa Dortmundyň» finaldaky garşydaşy beýleki ýarym finalyň şu gije guraljak jogap duşuşygyndan soň belli bolar.

Duşuşykda PSŽ-niň 31 urgusy derwezä girmedi. 2 oýnuň netijesi boýunça 44 urgusy takyk bolmadyk PSŽ-niň Pariždäki duşuşykda 4 urgusy sütüne degdi (2 oýunda jemi 6 urgy).