Birleşen Milletler Guramasynyň Ösüş Maksatnamasy (BMGÖM) we Beýik Britaniýanyň Türkmenistandaky ilçihanasy «Türkmenistanda aklawçylar birleşiginiň mümkinçiliklerini ýokarlandyrmak» taslamasyny goldamak barada Ylalaşyga gol çekdiler.

Bu Taslama Türkmenistanda aklawçylar birleşikleriniň halkara ülňülerine laýyklykda hukuk kömegini bermek mümkinçiligini ýokarlandyrmagy maksat edinýär. Hususan-da, muňa BMG-niň Jenaýat kazyýet ulgamlarynda hukuk kömegine elýeterlilik ýörelgeleri we teklipleri (2012-nji ýylyň 20-nji dekabry), Aklawçylaryň roly baradaky esasy ýörelgeler (Gawana, 1990) we Halkara aklawçylar birleşigi tarapyndan kabul edilen Hukuk jemgyýetiniň garaşsyzlygy boýunça standartlar (Nýu-Ýork, 1999-njy ýylyň 7-nji sentýabry) we beýlekiler girýär.

Aýratyn-da,Türkmenistanyň Milli aklawçylar palatasyny döretmekde aklawçylar birleşiklerine kömek edilmegine üns berler. Maksady aklawçylaryň bähbitlerine wekilçilik etmek we goramak, sebitlerdäki we Aşgabat şäherindäki adwokatlar guramalarynyň işini utgaşdyrmak, aklawçylardan ýokary hilli hukuk kömegini üpjün etmek we hukuk jemgyýetiniň bähbitlerine täsir edýän meseleleri çözmek. Bu derňew edaralary ýa-da kazyýet tarapyndan bellenen jenaýat aklawçylaryna tölemek üçin döwlet býudjet serişdeleriniň bölünip berilmegi baradaky aladalary öz içine alýar. Mundan başga-da, BMGÖM Türkmenistanyň aklawçylar birleşikleriniň işini sanlylaşdyrmakda kömek berer.

Taslama, 2021–2025-nji ýyllar üçin Adam hukuklary boýunça milli hereket meýilnamasynyň hukuk hünäri baradaky kanunçylygyny kämilleşdirmegini we hukuk hyzmatlaryna elýeterliligini, kazyýet işlerinde taraplaryň deňligini üpjün etmegi maksat edinýän, «Aklawçylar birleşiginiň ulgamyny kämilleşdirmek» atly ýörite bölümiň durmuşa geçirilmegine goşant goşar.