Bangkokda geçirilýän boks boýunça ikinji Bütindünýä Olimpiýa saýlama ýaryşyna gatnaşmak üçin Türkmenistanyň iň oňat üç türgeni wekilçilik eder.

133 ýurtdan 579 boksçyny birleşdiren saýlama ýaryşy, türgenler üçin 2024-nji ýylda Parižde geçiriljek Olimpiýa oýunlaryna gatnaşmak hukugyny gazanmak üçin iň soňky pursat bolar. 

Şükür Öwezow (57 kilograma çenli agram derejesinde), Saparmyrat Ödäýew (63,5 kilograma çenli agram derejesinde) we Baýramdurdy Nurmuhammedow (71 kilograma çenli agram derejesinde) Türkmenistanyň milli ýygyndysynyň hatarynda Olimpiýa oýunlaryna gatnaşmak hukugy ugrunda bäsleşerler.

Şükür Öwezow (57 kilograma çenli) ilkinji bolup meýdança çykar. Ol ilki Ziýad Ali Majraşi (Saud Arabystany) bilen göreşer. Bu göreşiň ýeňijisi indiki aýlawda Karlo Paalam (Filippinler) – Alekseý Lagkazaşwili (Gresiýa) tutluşygyň ýeňijisi bilen bäsleşer.

Saparmyrat Ödäýew (63,5 kilograma çenli) ilkinji söweşde Kong Çin Li (Gonkong) bilen göreşer. Bu göreşde ýeňiş gazansa ol indiki tapgyrda Wu Tan Dat (Wýetnam) – Sendbaatar Erdenebat (Mongoliýa) bilen söweşer.

Hançžouda (Hytaý) geçirilen ХIХ tomusky Aziýa oýunlarynyň bürünç medalynyň eýesi Baýramdurdy Nurmuhammedow 2022-nji ýyldaky Aziýa çempionatynyň 27 ýaşly bürünç medalynyň eýesi Byamba-Erdene Otgonbaatar (Mongoliýa) bilen göreşer. Onuň ýeňijisi ýaryşyň ikinji tapgyrynda Nişant Dew (Hindistan) – Armando Bigafa Bigate Naae (Gwineýa-Bisau) tutluşygyň ýeňijisi bilen bäsleşer.

Bangkokda geçirilýän bäsleşik dünýäniň çar künjeginden gelen boksçylaryň Olimpiýa oýunlaryna gatnaşmaga hukuk gazanmak üçin soňky mümkinçilikdir.

Pariž – 2024 Olimpiýa oýunlarynyň boks ýaryşy 27-nji iýuldan 10-njy awgust aralygynda «Rolan Garrosda» we «Pari Nord Arenasynda» geçiriler.