Türkmenistanyň Duşenbedäki ilçisi Aýmyrat Goçmyradow Täjigistan Respublikasynyň bilim we ylym ministri Rahim Saidzoda bilen duşuşdy.

Söhbetdeşligiň barşynda Türkmenistan bilen Täjigistanyň bilim pudagyndaky hyzmatdaşlygynyň geljegi barada pikir alyşyldy. Iki ýurduň ýokary okuw mekdepleriniň arasyndaky hyzmatdaşlygy güýçlendirmek meselesine aýratyn üns berildi.

Türkmenistanyň diplomatik missiýasynyň habaryna görä, özara gatnaşyklaryň çäginde Täjigistan Respublikasynyň Hatlon welaýatynyň Dusti etrabynda ýerleşen Ergaş Soltanow daýhan birleşiginde Magtymguly adyndaky orta mekdebi gurmak baradaky hökümetara şertnamanyň iş ýüzünde durmuşa geçiriljekdigi bellenildi.

Häzirki wagtda iki ýurduň arasynda bilim pudagynda hyzmatdaşlygy ösdürmek üçin diňe bir zähmet bazaryndaky zerurlyklar üçin ýokary hünärli hünärmenleri taýýarlamaga däl, eýsem, bilelikdäki bilim we gözleg işlerini giňeltmäge, ösen tehnologiýalara hem-de talyplaryň alyş-çalşygyna gönükdirilendir.