Anadoly sebiti gadymy siwilizasiýalaryň birnäçesiniň sallançagy hasaplanýar. Gündogar bilen Günbataryň duşuşýan ýeri hökmünde tanalýan sebit garaşylmadyk geň-taňlyklardan doly, sebäbi, her bir ädim, her daban ýer onuň taryhyny emele getirýär.

 

Ýurduň günbatar kenar ýakalarynda Egeýden Ortaýer deňzine çenli syýahat edip, miflerde şöhratlanan dünýäniň iň owadan gadymy hazynalaryny görersiňiz. Muzeýiň açylyş wagtyny uzaltmak baradaky taslamanyň çäginde häzirki wagtda ýary gijä çenli açyk bolýan käbir arheologiki ýerler has köp syýahatçynyň Türkiýäniň baý medeni mirasyny synlamagyna mümkinçilik döredýär. Sebit hökman görmeli gadymy şäherlerden doly. Ol Egeý we Ortaýer deňziniň arassa suwlary bilen taryp edilýär, şeýle hem bu ýerde ösen özboluşly aşpezlik däpleri bilen myhmanlary özüne çekýär, onsuz Ortaýer deňziniň aşhanasyny göz öňüne getirip hem bolanok.

 

Troýa rowaýatlarynyň sallançagy

Geň galdyryjy gadymy şäherler Türkiýäniň dürli künjeklerine ýaýrady, ýöne iň meşhurlaryndan biri, elbetde, ÝUNESKO-nyň Bütindünýä mirasynyň sanawyna giren antik döwre degişli bolan Troýa şäheri. Çanakkale şäherindäki Ida dagynyň eteginde Troýanyň dokuz medeni gatlagy bolup, ol köp sanly siwilizasiýanyň mekany hökmünde hyzmat etdi. Gomeriň ölmez-ýitmez «Iliada» eposyndaky söweşiň mekany hökmünde Troýa, Ýewropada Türkiýede başlaýan ýeke-täk resminamalaşdyrylan medeni ýol bolan Eneý ýolunyň başlangyç nokady.

Görmeli ýerler: Şäheriň girelgesinde ýerleşýän we muzeý işleri babatynda Ýewropanyň iň abraýly baýraklaryna eýe bolan Troýa şäheriniň eksponatlary. Troýa muzeýinde onuň taryhy we medeniýeti, sebitde tapylan artefaktlary we beýleki tapyndylary bilen logiki hem doly tertipde öz beýanyny tapdy.

 

Ajaýyp port şäheri bolan Efes

Egeý deňzi sebitiniň ýene bir meşhur gadymy şäheri, 2015-nji ýyldan bäri ÝUNESKO-nyň Bütindünýä mirasynyň sanawyna giren Efes şäheridir. Taryhdan öňki Osmanly döwrüne çenli takmynan dokuz müň ýyl bäri ýaşaýşy dowam edip gelen Efes bir wagtlar dünýäniň iň uly port şäherleriniň biri bolup, häzirki wagtda dünýäde aýawly saklanýan arheologiki ýerleriň biri bolup durýar. Bu ýerde Sels kitaphanasy we 30 müň tomaşaçy üçin niýetlenen Türkiýedäki iň uly ajaýyp amfiteatr, Gadymy dünýäniň ýedi täsinliginiň biri bolan Artemis ybadathanasynyň galyndylary, Mazeusyň we Mitridatesiň derwezeleri, Hadrian ybadathanasy we terassaly binalary bar. Şeýle hem ýadygärlikler we şäherdäki gündelik durmuşyň dynç alyşy bilen ýakyndan tanyşmak üçin Efes interaktiw muzeýine (sebitiň iň häzirki gözel ýerleri) aýlanyp bilersiňiz.

Görmeli ýerler: Efesde Rim Kiçi Aziýa welaýatynyň ýedi ybadathanasynyň biri bolandygy sebäpli, teolog Ioan Bogoslowyň aýanlyklarynda agzalýan şäher we onuň daş-töweregi irki hristiançylyk döwründäki täsin ýadygärlikleriň mekanydyr. Sebitdäki iň hormatlanýan mukaddes ýerlere Bibi Merýemiň öýi, Hoş Habarçy Ioan Bogoslowyň Baziligi we ýedi weliniň gowagy girýär.

 

Hierapolis, wagta boýun egmeýän kurort

Denizlidäki Pamukkale ýollarynyň gapdalynda bir wagtlar bejeriş we sagaldyş merkezi bolan Hierapolis ýerleşýär. Iki müň ýyl ozal syýahat ýollary Pergamon patyşalygynyň ýaşaýjylarynyň ünsüni özüne çekipdi we bu ýerde gurluşyk işlerine başladylar. Şäher, Pergamon Telephosyň meşhur esaslandyryjysynyň aýaly Hieranyň hormatyna atlandyrylypdyr. Hierapolisiň iň ajaýyp binalaryndan Rim hammamlary we amfiteatr bar. Mundan başga-da, mermerden ýasalan we sütünler bilen bezelen gadymy howuz köplenç açykdyr. Myhmanlar ýyly (36 dereje) suwa çümüp dynç alyp bilerler, rowaýata görä Müsüriň şa zenany Kleopatranyň özi şu ýerde suwa düşýän ekeni.

Görmeli ýerler: Şypa çeşmelerinde dynç alýarkaňyz, Pamukkale ýollarynyň ajaýyp görnüşlerinden lezzet alyň! Jennediň gar ýaly ak trawertinlere seredip özüňi ertekidäki ýaly duýarsyň we gyzgyn çeşmeleriň täsiri uzak dowam eder!

 

Aspendos — ajaýyp akustikasy bilen gadymyýetiň genji-hazynasy

Zemin togalagynda iň oňat goralýan amfiteatrlaryň biri Aspendosda (Antalýa welaýatynyň Serik etraby, Ortaýer deňzi sebiti) ýerleşýär. Ady rowaýatlara siňen bu meşhur teatryň esasy tapawutlanly aýratynlygy ajaýyp akustikasydyr. Kämil ses güýçlendirjiligi asyrlaryň synagyndan geçen Aspendos amfiteatrynda heniz hem konsertler we çykyşlar geçirilýär. Ahyrynda Aspendosyň şu güne çenli saklanyp galan akweduklaryna — şeýle binalaryň iň gowy mysallaryndan birine ünsi çekýär.

Görmeli ýerler: Bütin dünýäde akustikasy bilen tanalýan amfiteatrda 13 — 30-njy sentýabr aralygynda 31-nji Aspendos halkara opera we balet festiwaly geçiriler.