Türkmenistany 2022 — 2028-nji ýyllarda durmuş-ykdysady taýdan ösdürmegiň Prezident maksatnamasynda kesgitlenen wezipeleri ýerine ýetirmegiň çäklerinde, ýurduň paýtagty Aşgabat şäherinde Çagalar sungat mekdebiniň täze binasyny gurmak göz öňünde tutulýar. «Watan» habarlar gepleşiginde habar berlişi ýaly, şu gün — 21-nji iýunda sanly ulgam arkaly geçirilen nobatdaky Hökümet mejlisinde wise-premýer M.Mämmedowa bu binany gurmak boýunça alnyp barylýan işler barada hasabat berdi.

Hasabatda bellenilişi ýaly, Çagalar sungat mekdebiniň täze binasyny gurmak Aşgabat şäherinde ýaşaýyş jaý toplumlarynyň sanynyň has-da artýandygyny hem-de paýtagtyň ýaşaýjylarynyň isleglerini nazarda tutup teklip edilýär.

Hökümet mejlisinde, şunuň bilen baglylykda, Türkmenistanyň Prezidentiniň garamagyna degişli teklip hödürlenildi.

Döwlet Baştutany hasabaty diňläp, ýurtda çagalaryň abadan we bagtyýar durmuşyny üpjün etmek ugrunda maksatnamalaýyn işleriň durmuşa geçirilýändigini aýtdy. Bellenilişi ýaly, çagalary sungata ugrukdyrmakda, çeperçilik işlerine höweslendirmekde ähli şertler döredilýär.

Prezident Serdar Berdimuhamedow Aşgabatda Çagalar sungat mekdebiniň täze binasyny gurmak baradaky teklibi makullap, wise-premýer M.Mämmedowa bu babatda degişli işleri geçirmegi tabşyrdy.