Özbegistandaky «Çimgan» halkara ähli möwsümler üçin şypahanasynda sagatda 800 adamlyk kuwwatlylygy bolan maýatnik görnüşli beýik dag asma ýoly gurlar. Tanap arkaly işleýän dag demir ýoly 3309 metr beýiklige çykar we Merkezi Aziýada iň beýik desga bolar diýip Podrobno.uz habar berýär.

Ýurduň prezidenti Şawkat Mirziýoýew 260 million dollardan gowrak gymmaty bolan Çimgan şypahanasynyň gurluşygyny çaltlaşdyrmak üçin birnäçe çäräni tassyklady. Taslama dürli görnüşli dynç alyş bilen döwrebap toparyň gurulmagyny göz öňünde tutýar.

Syýahatçylyk toplumynyň potratçysy Fransiýanyň «Montagne et Neige Développement» (MND) kompaniýasydyr. Belent dagdaky şypahana ýylda 3 milliondan gowrak adamy kabul edip biler. Esasy asma ýoldan başga-da, sagatda iň ýokary kuwwaty 2000 adam bolan ikinji gondola görnüşli funikulýar gurmak meýilleşdirilýär. Ol 2515 metr beýiklige çykar.

Taslamanyň çäginde bu ýerde gyş we tomus attraksionlaryň 20-den gowrak görnüşi: XXL Zip line, Alpine coaster, Adventure tower, Tubing, Via ferrata gurlar, uzynlygy 20 km-den gowrak bolan dürli derejeli kynçylykly 11 lyža ýollary enjamlaşdyrylar we 6 müň syýahatçylyk ýerleri üçin myhmanhana toplumlary we kottejler gurlar.