“Türkmenaragatnaşyk” agentligi Bütindünýä durnukly ulag güni mynasybetli Aşgabatda çäre geçirdi
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň “Türkmenaragatnaşyk” agentligi 26-njy noýabrda bellenilýän Bütindünýä durnukly ulag güni mynasybetli Aşgabatda çäre gurady.
Maslahata gatnaşyjylar Gün tertibi—2030-yň maksatlaryna ýetmekde, hususan-da, durnukly ykdysady ösüşe, adamlaryň rowaçlygyny ýokarlandyrmakda we halkara hyzmatdaşlygyny ösdürmekde howpsuz durnukly ulag ulgamlarynyň möhüm ornuny ara alyp maslahatlaşdylar.
“Türkmenaragatnaşyk” agentliginiň başlygynyň orunbasary Nurmyrat Rejebow öz çykyşynda Türkmenistanyň durnukly ulagy ösdürmekde edýän tagallalary, ýurdumyzyň bu ulgamdaky halkara başlangyçlary barada gürrüň berdi. Şunuň bilen baglylykda, Türkmenistanyň ulag diplomatiýasyny durmuşa geçirmegiň çäklerinde “Türkmenaragatnaşyk” agentliginiň amala aşyrýan taslamalary barada habar berdi.
“Türkmenpoçta” aragatnaşyk kompaniýasynyň direktorynyň orunbasary Yhlas Amandurdyýew “Elektron resminama, elektron resminama dolanyşygy we sanly hyzmatlar hakynda” Türkmenistanyň Kanunyna laýyklykda ýurdumyzda sanly hyzmatlaryň kämilleşdirilişi barada gürrüň berdi, şeýle hem kompaniýanyň hünärmenleri tarapyndan işlenip taýýarlanylan elektron platformasy bilen tanyşdyrdy. “Türkmenpoçta” ulagyň dürli görnüşleri bilen harytlaryň ygtybarly we öz wagtynda eltip berilmegini üpjün edýär.
Bütindünýä durnukly ulag gününi döretmek baradaky kararnama Türkmenistanyň başlangyjy boýunça BMG-niň 77-nji sessiýasynyň 70-nji plenar mejlisinde kabul edildi. Dünýäniň 67 ýurdy onuň awtordaşy bolup çykyş etdi.
Hut 2016-njy ýylyň 26-njy noýabrynda Aşgabatda BMG-niň durnukly ulag boýunça birinji ählumumy maslahaty geçirilipdi.
BMG-niň Baş Assambleýasynyň kararnamasyndan ygtybarly, durnukly infrastrukturany ösdürmek arkaly integrirlenen ulag ulgamyny döretmegiň esasynda ulaglaryň özara baglanyşygyny ýokarlandyrmakda hyzmatdaşlyk etmegiň, awtomagistrallaryň, ýollaryň, köçeleriň, demir ýollaryň, suw ýollarynyň, howa ýollarynyň ulag halkalarynyň we portlaryň özara baglanyşyk ulgamyny ösdürmegiň bähbidine tejribe alyşmagyň möhümdigi bellenilýär.