23-nji noýabrda Azerbaýjanyň Baku şäherinde BMG-niň Merkezi Aziýa ýurtlarynyň ykdysadyýetleri üçin ýörite maksatnamasynyň (SPEKA) Dolandyryş geňeşiniň 18-nji mejlisi geçirildi.

Maksatnamanyň döredilmeginiň 25 ýyllygy mynasybetli guralan bu çärä Azerbaýjanyň, Gazagystanyň, Gyrgyzystanyň, Täjigistanyň, Türkmenistanyň, Özbegistanyň we Wengriýanyň degişli ministrlikleriň ýolbaşçylary, şeýle hem Birleşen Milletler Guramasynyň degişli düzümleriniň, BMG-niň Ýewropa ykdysady komissiýasynyň (UNECE) we BMG-niňň Aziýa-Ýuwaş umman sebiti üçin ykdysady komissiýasynyň (ESCAP) wekilleri gatnaşdylar.

Türkmenistanyň maliýe we ykdysadyýet ministriniň orunbasary Begmyrat Allakbaýew öz çykyşynda Hazar deňziniň portlaryny birikdirmek we söwda we üstaşyr ýük geçiriş ulgamlaryny sanlylaşdyrmak arkaly Merkezi Aziýanyň üsti bilen ýük daşamak üçin multimodal aragatnaşyk ulgamyny emele getirmegiň hem-de ulag aragatnaşygyny giňeltmegiň möhümdigini belledi.

Türkmenistanyň wekili şeýle hem SPEKA ýurtlarynyň barha artýan energiýa zerurlyklaryny göz öňünde tutup, Türkmenistanyň tebigy gaz we elektrik energiýasy bilen üpjünçiligiň mukdaryny artdyrmaga taýýardygyny belläp, bu ugurda özara gatnaşyklary ösdürmegiň tarapdarydygyny aýtdy.

Maslahatyň dowamynda gün tertibinde ileri tutulýan meseleler barada pikir alşyldy we sebit ýurtlaryň arasyndaky arabaglanyşygy we köptaraplaýyn hyzmatdaşlygy has-da pugtalandyrmak boýunça umumy garaýyşlar işlenip düzüldi.

Çäräniň netijesinde, gatnaşyjylaryň hemmesi degişli maksatlara ýetmek üçin bilelikde işlemäge taýýardyklaryny ýene bir gezek tassykladylar. SPEKA-nyň Dolandyryş geňeşi tarapyndan birnäçe karar kabul edildi hem-de Maksatnamanyň 2024-2025-nji ýyllar üçin Iş meýilnamasy tassyklandy. SPEKA-nyň başlyklygy Azerbaýjandan Täjigistana geçirildi.

SPEKA-nyň 19-njy sammitiniň geljek ýyl Täjigistanyň paýtagty Duşenbe şäherinde geçiriljekdigi habar berildi.

SPEKA-nyň şu gezekki sammitiniň maslahatlary 20-24-nji noýabry aralygynda Baku şäherinde geçirilýär. 24-nji noýabrda bolsa, BMG-niň Merkezi Aziýanyň ykdysadyýetleri üçin ýörite maksatnamasyna gatnaşýan döwletleriň Baştutanlarynyň sammiti geçiriler.