9-njy aprelde Türkmenistanyň daşary işler ministriniň orunbasary A.Gurbanow bilen Italiýanyň daşary işler we halkara hyzmatdaşlyk ministriniň orunbasary Edmondo Çiriýelli bilen duşuşyk geçirildi.

Duşuşykda taraplar syýasy-diplomatik, söwda-ykdysady we medeni-ynsanperwer ugurlarda ikitaraplaýyn gatnaşyklaryň ösüşini ara alyp maslahatlaşdylar. Bu barada Türkmenistanyň DIM-iniň resmi saýtynda habar berildi.

Türkmenistanyň we Italiýanyň hökümetara hem-de pudagara gatnaşyklarynyň ikitaraplaýyn gatnaşyklary pugtalandyrmaga goşant goşýandygy aýratyn nygtaldy.

Duşuşykda Merkezi Aziýa bilen Italiýanyň arasynda köpugurly hyzmatdaşlyk ulgamyny döretmek boýunça 2024-2025-nji ýyllar üçin hereketleriň meýilnamasyny tassyklamak başlangyjy boýunça pikir alşyldy. Bu meýilnama energiýa özgertmeleri, suw serişdeleri, saglygy goraýyş, oba hojalygy, ýokary bilim we ulag ýaly ugurlary öz içine alýar.

Şeýle-de söwda-ykdysady we maýa goýum hyzmatdaşlygynyň möçberini artdyrmagyň ýollary giňişleýin ara alnyp maslahatlaşyldy.

Nebit-gaz toplumy, demir ýol ulgamy, dokma senagaty, oba we suw hojalygy ikitaraplaýyn hyzmatdaşlygyň ileri tutulýan ugurlarynyň hatarynda bellenildi.

Mundan başga-da, ynsanperwer ulgamda, hususan-da bilim, arheologiýa we medeniýet ugurlarynda gatnaşyklary işjeňleşdirmäge bolan özara gyzyklanma tassyklanyldy.