Türkmenistanyň, Özbegistanyň, Eýranyň we Türkiýäniň demirýol edaralarynyň wekilleri Stambul şäherinde ilkinji bilelikdäki mejlisi geçirdiler. Onda Özbegistan-Türkmenistan-Eýran-Türkiýe multimodal ulag geçelgesini ösdürmek meseleleri ara alnyp maslahatlaşyldy.

Duşuşykda, esasan hem, ulag geçelgesi boýunça demirýol daşamalarynyň nyrhlaryny peseltmek we onuň üsti bilen ýük daşamalarynyň mukdaryny artdyrmak meseleleri boýunça pikir alşyldy. Taraplar ulag geçelgesi boýunça ýük daşamalarda emele getirilen amatly we bäsdeşlige ukyply nyrhlaryň harytlaryň hem-de ýükleriň daşalyş möçberlerini artdyrmaga ýardam etjekdigi hakynda bitewi düşünjä geldiler.

Mejlisiň jemleri boýunça ulag geçelgesine gatnaşyjy demirýol edaralarynyň arasynda Teswirnama gol çekildi. Bu resminama degişli taslamany üstünlikli durmuşa geçirmekde hyzmatdaşlyk we bilelikdäki tagallalar üçin ähli taraplaryň ylalaşandygyny tassyklamak bilen ulag geçelgesini ösdürmekde möhüm tapgyry açýar.

Özbegistan-Türkmenistan-Eýran-Türkiýe ulag geçelgesini döretmek hakynda Teswirnama şu ýylyň 2-nji noýabrynda Özbegistanyň paýtagty Daşkentde geçirilen Ykdysady Hyzmatdaşlyk Guramasyna agza döwletleriň ulag ministrleriniň 12-nji duşuşygynyň çäklerinde gol çekilipdi. Bu geçelge ulag infrastrukturasyny we sebit ýurtlarynyň arasyndaky söwda gatnaşyklaryny ösdürmekde möhüm guraldyr.

Bu multimodal ulag geçelgesiniň ösdürilmegi ykdysady gatnaşyklary berkitmäge we Özbegistan, Türkmenistan, Eýran we Türkiýäniň arasynda söwda mümkinçilikleri giňeltmäge ýardam eder. Şeýle hem ol sebitdäki ulag düzümleriniň elýeterliligini we netijeliligini ýokarlandyrar we ykdysadyýetiň ösmegine we ýurtlaryň arasyndaky hyzmatdaşlygy pugtalandyrar.