Häzirki wagtda Gazagystanyň we Pakistanyň arasynda demir ýol arabaglanyşygy ýokdur. Munuň deregine, şol sanda Türkmenistanda bar bolan üstaşyr geçelgeleriň netijeli ulanylmagynyň uly geljeginiň barlygy bellenilýär.

Bu barada Gazagystanyň ulag ministriniň orunbasary Talgat Lastaýew 23-nji ýanwarda Pakistan Yslam Respublikasynyň aragatnaşyk, demir ýol we deňiz işleri ministriniň birinji orunbasary bilen bolan duşuşygynda mälim etdi. Onuň aýtamgyna görä, häzirki wagtda demir ýol we awtomobil ulagy arkaly Gazagystan – Türkmenistan – Owganystan – Pakistan ugry boýunça multimodal ulag gatnaşyklaryny guramak mümkinçilikleri bar.

Lastaýew Gazagystanyň Pakistan bilen hyzmatdaşlygy ösdürmäge meýillidigini tassyklap, degişli ugurda hyzmatdaşlygy işjeňleşdirmek üçin taraplaryň ilkinji nobatda netijeli ulag-logistika ulgamyny döretmekleriniň zerurdygyny aýtdy.

Şeýle hem deňiz ulagy pudagynda hyzmatdaşlygyň geljekki mümkinçilikleri bellenip geçildi. Şunda “Demirgazyk – Günorta” we “TMTM” (Orta/Hazarüsti ulag geçelgesi) halkara ulag ugurlaryny bilelikde ösdürmek işine gatnaşmak teklip edildi.