Demir ýol ulaglary we demir ýol senagaty boýunça halkara sergisiniň guralmagy Tähranda her ýyllyk adata öwrüldi. Iri halkara sergisi 2013-nji ýyldan bäri geçirilip gelinýär. Sergide demir ýol pudagynda ulanylýan iň täze tehnologiýalar, iň soňky demir ýol tehnikalary we enjamlar hödürlener.

 

Eýranyň hökümeti köp sanly taslamalary durmuşa geçirmek we meýilleşdirmek arkaly demir ýol pudagynyň ösüşine goldaw berýär. Bu taslamalaryň demir ýol toruny takmynan 10 000 kilometre çenli giňeltmek we bar bolan demir ýol ulgamyny hem-de degişli infrastrukturany döwrebaplaşdyrmak üçin 25 milliard ABŞ dollaryna barabar bolan serişdäniň harçlanmagyna garaşylýar.

 

Iň möhüm demir ýol taslamalary Raşt-Astara we Çabahar—Zahedan—Meşhet demir ýollarynyň gurluşygydyr. Munuň özi Eýranyň gündogarynda Oman aýlagynyň kenaryndaky Çabahar portuny Türkmenistanyň we Azerbaýjanyň serhet geçelgeleri bilen birleşdirýän «Demirgazyk — Günorta» üstaşyr geçelgesiniň döremegine mümkinçilik berer. Taslamanyň daşary ýurtly hyzmatdaşlar tarapyndan maliýeleşdirilen ýagdaýynda bu demir ýoluň gurluşygynyň tamamlanmagy üçin takmynan 5 ýyl töweregi wagt gerek bolar.

 

Şeýlelikde, 180 km Reşt — Astara, Tähran — Kum — Yspyhan ýokary tizlikli demir ýoly we Miýane — Töwriz, Miýane — Ardebil, Tähran — Hemedan — Senendej, Gorgan — Bojnurd — Maşat we Şiraz — Buşer — Asaluýe ugurlaryny özünde jemleýän 8 demir ýol taslamasynyň gurluşygyny Hytaý, Hindistan we Russiýa maliýeleşdirýär.

 

Bu çäre Germaniýanyň Federal ykdysadyýet we energetika ministrligi tarapyndan öňe sürlen daşary söwda ýarmarkasynyň maksatnamasyna girizildi. Mundan başga-da, Italiýa we Hytaý ýaly guramaçylykly sebit pawilýonlaryna pudak ýolbaşçylarynyň gatnaşmagy iri çärä ýokary halkara gyzyklanmasynyň görkezijisidir.

 

Demir ýol ulaglarynyň, enjamlaryň we şuňa meňzeş pudaklaryň 10-njy halkara sergisi 2023-nji ýylyň sentýabr aýynda geçip, ol 9 ýurtdan, şol sanda Eýrandan 140 we daşary ýurtlardan — Şweýsariýadan, Fransiýadan, Hindistandan, Türkiýeden, Latwiýadan, Ispaniýadan, Russiýadan, Hytaýdan hem-de Germaniýadan bolan kompaniýalaryň 20-sini bir ýere jemledi.