“Türkmenistanyň Merkezi Aziýada parahatçylygy we howpsuzlygy pugtalandyrmagy maksat edinýän halkara başlangyçlaryny goldaýarys. BMG-niň düzümleriniň işinde türkmen diplomatlarynyň uly goşant goşýandygyny bellemelidiris. Şu sebäpli Türkmenistan sebitde umumy ykrar edilen möhüm we halkara gatnaşyklarynda ähmiýetli orny eýeleýär” diýip, Russiýa Federasiýasynyň Türkmenistandaky ilçisi Iwan Wolynkin aýtdy.

18-nji fewralda Türkmenistanyň Diplomatik işgärleriniň güni mynasybetli geçirilen çäreleriň dowamynda türkmen telewideniýesi bilen geçiren söhbetdeşliginde rus ilçisiniň belleýşi ýaly, Bitaraplyk ýörelgesine ygrarly türkmen diplomatiýa mekdebiniň halkara guramalaryň çäklerinde, şol sanda ikitaraplaýyn görnüşde özara hormat goýmak, parahatçylyk söýüjilik we dialoga taýýarlyk syýasatyny yzygiderli alyp barýar. Onuň sözlerine görä, halkara çäreleri ýokary guramaçylyk derejesinde geçirilmegi Türkmenistan üçin uly ähmiýete eýe boldy.

“Russiýa Garaşsyz Türkmenistanyň binýatlaýyn esasyny şöhlelendirýän daşary syýasy ugruna çuňňur hormat goýýar. Çünki häzirki bölünýän çyzykly dünýäde uzak möhletli bitarap galmak üçin ilkinji nobatda pugta erk we häsiýet zerur” diýip, Russiýa Federasiýasynyň Türkmenistandaky ilçihanasynyň web-saýty ilçiniň sözlerini getirýär.

Ýurtlarymyzyň doganlyk halklarynyň arasynda ýakyn dostlugyň we ynanyşmagyň ýokary derejesini kemala getirmekde diplomatik gullugyň ägirt uly goşandy bardyr. “Şu ýylyň hem rus-türkmen gatnaşyklaryny we özara bähbitli hyzmatdaşlygy mundan beýläk-de ösdürmekde netijeli boljakdygyna ynanýaryn” diýip, Wolynkin aýtdy.

Sözüni ahyrynda rus ilçisi Türkmenistanyň ussat diplomaty, daşary işler ministri Raşid Meredowy we milli diplomatik gullugyň ähli işgärlerini hünär baýramy bilen tüýs ýürekden gutlady hem-de üstünlikleri arzuw etdi.