Magtymguly Pyragynyň doglan gününiň 300 ýyllygyna, şeýle hem Türkmenistanda 2024-nji ýylyň “Pähim-paýhas ummany – Magtymguly Pyragy” ýyly diýlip yglan edilmegi mynasybetli, 20-nji fewralda Türkmenistanyň Ermenistan Respublikasyndaky ilçisi Muhammetgeldi Aýazow Ýerewan döwlet uniwersitetiniň Gündogary öwreniş fakultetiniň talyplarynyň öňünde “Magtymgulynyň filosofiki mirasy - Türkmenistanyň daşary syýasat doktrinasynyň esasydyr ” mowzugynda umumy sapak berdi.

Ilçi şeýle hem köp ýyllara uzaýan türkmen-ermeni medeni-edebi gatnaşyklarynyň üstünde durup geçdi. Ol Gegam Sarýan, Ýegişe Çarens, Silwa Kaputikýan ýaly ermeni şahyrlarynyň eserleriniň türkmen dillerine terjime edilendigini we dürli edebiýat neşirlerinde we žurnallarynda çap edilendigini belledi. Şeýle hem türkmen ilçisi Türkmenistanyň döwürleýin neşirlerinde ermeni ýazyjylarynyň we şahyrlarynyň türkmen diline terjime edilen eserleriniň neşir edilýändigini aýtdy. Bu barada Türkmenistanyň Ermenistan Respublikasyndaky ilçihanasy habar berýär.

Ilçi M.Aýazow ýygnananlara Magtymguly Pyragynyň pähim-paýhasynyň - agzybirlige, parahatçylyga, dostluga, watansöýüjilik duýgularyna çagyryş aýdymlarydygyny beýan etdi. Sapagyň ahyrynda Magtymulynyň goşgularynyň ermeni diline neşir edilen otkrytkalary talyplara ýadygärlik hökmünde berildi.